A folla azul
A Amazonia é un mundo verde e único. Tamén é o fogar de moitas tribos indíxenas que viviron alí desde o inicio dos tempos. Algunhas delas manteñen relación coa civilización, mentres que outras decidiron permanecer voluntariamente ocultas no corazón da selva. A miña tribo é unha delas. Eu son Husu Aké, membro da tribo dos Tacaré, filla da Nai Terra e habitante do mundo verde. E esta é a miña historia…
Conta nove estrelas
Conta nove estrelas é unha obra de ficción científica para nenos que sucede na descoñecida Galaxia Oma. No máis remoto planeta desta galaxia, oculta nunha pequena cabana, vive unha nena de cabelo turquesa chamada Quepi que ten o extraordinario don de comunicarse coa natureza.
O que sei do silencio
Inspirada libremente nunha historia real, O que sei do silencio é, quizais, unha das novelas máis intensas e complexas que escribín. Narrada en forma de blog, relata en primeira persoa como Delia e as súas amigas acosan á rapaza nova do instituto, Silke. E como todo se lles vai das mans…
Europa Express
Europa Express é unha novela inspirada nas miñas viaxes de interrail: tres meses en tres veráns consecutivos percorrendo Europa de tren en tren, cunha mochila chea de experiencias. E de postais para a miña colección. Imaxinas chegar a unha pequena cidade norueguesa que visitaches hai dez anos e descubrir que apareces nunha postal? Aínda soño con que me poda suceder a min…
Volverás, golfiño
A familia de Iris vese obrigada a mudarse á casa do avó na Costa da Morte. Alí as longas tardes do verán énchense coas visitas da nena ao desacougante areal de Trece e coa luz do faro de Cabo Vilán, que advirte de invisibles perigos. Algo escuro se agocha no baúl que Iris descubre no faiado e que inexplicabelmente leva escrito o seu nome…
Miña querida Sherezade
Ser un libro é marabilloso. Agás cando chega a vellez. Entón decátaste de que estás feito un farrapo. Os personaxes que viven dentro de ti danche as costas porque non podes ofrecerlle a vida que eles queren. Caes enfermo. Tés tanta febre que súas tinta. E sentes a morte moi preto. Eu non quero rematar así. Sei que aínda teño unha historia máis que contar. Non está nas miñas páxinas, senón gravada no meu corazón. E non é unha soa, senón moitas…
Nubes de evolución
Cando estudaba na universidade, pasaba longas horas de espera na estación de autobuses, agardando o momento de poder volver a casa. Aburrida, comecei a imaxinar as vidas daquelas persoas coas que me cruzaba acotío. O home de mediana idade que camiñaba apoiado nun paraugas co que parecía querer ferir o mundo. A rapaza da limpeza, sempre tan abrigada que parecía ter o frío instalado na súa alma. O mozo da bolsa de deportes, protexido pola música dos seus cascos cos que parecía protexerse do mundo…
O segredo do lagarto arnal
Despois dunha visita ao que será o seu instituto no curso próximo, David sente que algo non vai ben. As sombras dos lagartos perségueno na rúa, na escola e mesmo na casa, facéndoo lembrar intensamente a aldea dos seus avós, Santo Antón de Piñeiro…
Violeta tamurana
As fermosas tamuras, capaces de provocar bágoas coa súa beleza, son unhas flores únicas que só medran no corazón volcánico da illa de Tamurana, a máis especial das que forman o Arquipélago Perdido. A pesar da vida harmoniosa que durante séculos levaron os habitantes do Arquipélago, unha maldición pesa sobre as súas vidas e tamén, sobre a das illas: a súa cor violeta.
Proxecto bolboreta
Hadrián Barcés, matemático é gran soñador, decide realizar unha viaxe dende Pequín a Nova York coa intención de comprobar a veracidade do conxunto de teorías coñecidas como “Efecto Bolboreta”, acuñadas por científicos como James Gleick e Edward Lorenz a partir do proverbio chinés: “o bater das ás dunha bolboreta pódese sentir ao outro lado do mundo”…