A folla azul

Esta novela está protagonizada por unha tribo ficticia, os tacaré. Porén, inspírase nunha tribo real, a dos kayapó. A súa forma de ver e entender o mundo, os seus costumes e tradicións e mesmo algunha das súas palabras baséanse na destes defensores e defensoras da natureza.

Os kayapó ou Mebêngôkre (do lugar da auga) viven na Amazonia brasileira. Hai anos que sigo a historia desta tribo á que admiro pola súa oposición á construcción da presa que anegaría os seus terreos, pola súa loita para preservar a selva que habitan e pola crenza de que, se destruímos as formas de vida ancestrais da Amazonia, destruímos unha parte esencial do noso planeta. Eles e elas son os gardiáns do mundo verde.

Con todo, o personaxe máis importante desta historia para min é Arumi, a avoa de Husu. Nela vexo á miña propia avoa. E sinto que, a pesar de que xa non estea comigo, a súa sabedoría segue acompañándome en cada paso do camiño.